Bert 'Op Streek'

Al een jaor of wat bin 'k gaangs met het Drèents, mar dan veural het zingen en 't schrieven van liedties in 't Drèents. Gaondeweg koj dan in anraking met aandere streektaolzangers, zangeressen, troubadours en dichters die in heur iegen streektaol schrieft, zingt en dicht.
De schoonheid en variatie van de verscheiden taolen is dan wat mij opvalt; het smangs wat bonkige Grunnings, de dikke 'L' in het Fries, de wat aparte è-klank in het Stellingwarver taolgebied, de alum bekende zachte 'g' oet ’t Zuden van het laand, mar ok het platt-duuts, dat zo machtig veul op oeze Drèentse taol lek dat die grèens tussen de beide landen wal haost een vergissing weden möt.

As meziekmetwarker bij het Huus van de Taol he 'k veural te maken met de verscheiden Drèentse dialecten en allén daor zit vaak al een wereld van verschil tussen. Ik vin dat mooi um te heuren umdaj drekt in de gaten hebt waor of iene vort komp.
In september bin ik begund bij RTV Drenthe met een radiopregram 'Op Streek'. In 'Op Streek' drèei ik enkel streektaolmeziek. Niet allén oet Drenthe, niet allén oet ’t Noorden, mar oet hiel Nederlaand en wied daorboeten. Van fantastische traditioniele meziek oet het oeterste puntien van Noorwegen en Zweden, tot stevige rock oet Catalonië, van Duo Karst tot Gé Reinders en van polka tot punk.
Ien en al verscheidenheid in meziek, net as al die taolen die veurbij komt.
In 'Op Streek' zit een stuk of wat vaste rebrieken as De plaat van de maond, Veer op 'n riege , Zeg a'k je even wat vraogen mag? en
De vrumde eend.

Bij de rebriek Zeg a'k je even wat vraogen mag  is der een meugelkhied um een plaat an te vraogen. Laot an mij weten waorum ij dat liedtien zo geern heuren wilt, doe je verhaal en ik prebeer het liedtien veur je te drèeien.
Ok he'k zo non en dan een mezikale gast in de studio die een stuk of wat liedties 'live' speulen komp en waor o'k een vraoggesprek met heb. As dat nog niet genog is gauw ok met 'Op Streek' op pad.
As der een optreden is die de streektaolmeziekliefhebber ansprek en RTV Drenthe de meugelkheid hef um hen te gaon met de opnamewagen, dan doew dat! Dizze exclusieve opnames bint dan ok weer te heuren in 'Op Streek'.

Wat dat angiet he 'k al zinnigheid an de oetzending op Neijaorsdag. Dan hew zowat de hiele oetzending 'live' meziek vanoet de studio met mezikaanten die wat bezunders daon hebt of op een bezundere wieze in neis west bint in 't oflopen jaor. Een mezikaal jaoroverzicht dus, met een beste bult euliebollen en knieperties der bij.
Ik neudig je in ieder geval oet um ies te luustern naor 'Op Streek' op Radio Drenthe; zundagsnommerdags tussen 13.00-15.00 uur met 'Grootse meziek in kleine taolen'.