Facebook Twitter

LinkedIn

 

Bert in 't Drèents


In april 2007 is de eerste drentstaolige plaat van Bert oetbracht. De plaat het ‘Nooit dacht’.
Op de plaat staot 15 eigenschreven liedties maakt deur Bert Kamping, Kees Hendriks en Eddy Hoogland.

Anleiding tot de plaat was een oetneidiging van RTV Drenthe (deur Egebert Meyers) um ies te kommen zingen in het pregram ‘Podum 30’ met Lucas Koops. Veurweerde was dat de liedties in ’t Drèents weden mussen. In die oetzending bint twie liedties daon en het begun van de plaat was der.
Bezunder an ‘Nooit dacht’is het moderne geluud van de plaat en de verscheidenheid van meziekstijlen die veurbij kompt. Het miest opvallend is de metwarking van musicalster en goede vriendin Joke de Kruijf die naodrukkelijk op de plaat metzingt en zölfs een riegel in Drèents zingt.

De plaat ‘Nooit dacht’wuur indertied nomineerd veur de ‘Dagblad van het Noorden Streektaalprijs 2007’

An ’t èende van 2007 wuurden Kees Hendriks en Bert Kamping oetroepen tot de
suksesvolste liedtiesschrievers van Drenthe deurdat der veer liedties oetkeuzen waren deur de Stichting Drentse Muziek Maatschappij veur de plaat SDMM-1.
De oetkeuzen liedties waren: ‘As ik wus (waor ik naor zöcht)’, Vannacht blief ik bij je’ (met Anne-Lie Persson), ‘Zoas ij bent’ en ‘Ik pluk de dag’.

In november 2008 verschient de plaat ‘Zuken’ en wordt prissenteert in Theater De Muzeval.
Op dizze plaat staot 13 neie eigenschreven drèentstaolige liedties van Bert Kamping en Kees Hendriks over de zuuktocht van het leven, het maken van keuzes en het vastholden of juust löslaoten van herinnerings. Op dizze plaat hef ok de in Leek geboren musicalster en liedtiesschriever Tony Neef metwarkt. Samen met Bert scheef en zung e het duet ‘Kameraod’.
Het was de eerste maol dat Tony in ’t Drèents zung op een plaat.

De plaat ‘Zuken’ kreeg geweldige kritieken en wuur ok nomineerd veur de ‘DvhN Streektaalprijs 2008’

Wieder wuur Bert in 2008 oetroepen as ‘Beste dialekt-act van Drenthe -2007’ deur de Stichting Nederlandse Streektalen en Dialecten.

Bert wuur èende 2008 vraogd deur RTV Drenthe um as gastzanger op te treden met de baigband Want2Swing in het Karstpregram ‘Hillige daag’.
Veur dizze gelegenheid wuur het liedtien ‘Zuken’ arrangeerd veur bigband deur liedtiesschriever.arrangeur en dirigent van Want 2Swing, Marco Kerver.

Begun 2009 schrif Bert het liedtien ‘Jouw ogen’ bij het gelieknamige fotoboek-prejekt veur Dagcentrum ‘De Westhoek’ in Beilen.
Het liedtien, een duet, wordt samen met Joke de Kruijf inzungen en gruit oet tot een regionale hit. Het liedtien stiet twentig weken noteerd waorvan wie weken op nummer 1 in de ‘Drentse 30’ van RTV Drenthe. Bij het liedtien is een clip maakt deur de bekende producer/regisseur Jan Pronk.
De foto’s in het boek bint maakt deur Maarten Corbijn, Gwendolyn Huizendveld, Kees Tabak, Andreas Terlaak, Clemens Rikken, Frank Ruiter, Tessa Posthuma de Boer, Hans Peter van Velthoven, Govert de Roos, Sake Elzinga, Paul Bergen en Michel Porro.

Het prejekt is unstaon naor anleiding van optredens in ‘De Westhoek’van u.a. Candy Dulfer, Youp van ’t Hek, Henk Wijngaard, Anita Meyer en aandern. Via het netwark van verscheiden bekende Nederlanders is het idee unstaon um dielnimmers te laoten schitteren veur de camera’s van bekende fotografen.

‘De Westhoek’ is een underdiel van Stichting De Leite. Sinds 2007 valt dizze stichting, samen met Stichting RIBW-Drenthe, under de holding Promens Care. Promens Care verlient zörg en diensten an mèenschen met een verstandelijke beparking, een psychiatrische beparking en mèenschen die gebroek maakt van de maatschappelijke opvang.

In september 2010 speulde Bert as Drèenste ofvaardiging op het BUMA.NL Dialectfestival.
Het festival wuur landelijk oetzunden deur zowat alle regionale tilleviesie-umroepen van Nederlaand.
 

In 2011 hef Bert de H.T. Buiskool trofee oelangt kregen van Drèentse verieniging 't Aol Volk veur het wark dat e verzet hef veur de Drèentse taol.

 

 

 


Nooit dacht hoes

Joke de Kruijf, Bert Kamping inzingen Nooit dacht



Stichting Drentse Muziek Maatschappij logo  
SDMM-1 hoes

 Zuken hoes

Tony Neef, Bert Kamping

 

Jouw ogen hoes   

  Joke de Kruijf, Bert Kamping clip Jouw ogen

 

 

 

 

 

 

 

 

Buiskool-trofee (Boudewijn Benting)

(foto: Boudewijn Benting)